Cow leg nor be cornbeef!
by Ikhide R. Ikheloa
America Police nor go kill me O! Every week for America, we dey do environmental, that is, for night you go put your dustbin outside, for morning, environmental people go come carry am with their agbegilodo lorry. The dog and the deer wen dey our compound dem plus the vulture dem nor like me at all at all. Dem be racist because dem nor like say Black man like me dey gbaladun for oyinbo neighborhood. I don call police for dem tire, still yet dem nor dey hear word. Di ting pass me. If I just put my dotty for outside like this those witch dem wen be animals go throway di dotty make everybody see dey laff me.
I go wake up for morning, come see vulture and dog and deer they laff my dotty, for road. See wahala O, all di cowfoot, abodi, roun’about, cowtail, chicken leg, chicken yansh plus eba and pounded yam and orisirisi rice don full ground. Whenever I put only oyinbo food like caviar, coleslaw, pasta and em corned beef for dotty dem nor dey troway my dotty for ground mek people know say I dey enjoy. Mba O, na only when I nack our native village food (oporoko, white soup, black soup, isiewu, etc.) naim this witch dem dey fall my hand.
So, last week for environmental (yes o, nor be only una dey do environmental for Naija, we dey do environmental too na) naim di yeye racist dogs and deer when dey our neighborhood come throway all our dotty for road for America. Our yeye oyinbo neighbor wen nor kuku like us before as she dey waka im dog now, naim e see our dotty plus all di bone dem. See wahala! Riiiing! Riing! Idiot racist don call Police with blackberry say e see with im krokro eye “what appear to be finely ground fragments of human bones and remains!” Chei! See me see trouble o, malu wen go America don become James Brown! So naim police run come with their wahala, come see ambulance (I nor know wetin ambulance dey come do with malu bone, maybe na to take am go hospital, SMH).
Even sef, police come with gun, whether dem wan shoot the malu bone I nor know. Some people come when dey call themselves HAZMAT (Hazardous Materials) team, with white coat, mask for face, gloves for hand, come dey touch everything for my domot. Fire Brigade come too! Meanwhile our neighbor don faint for our domot after e don call lawyer ( “Post Traumatic Stress Disorder on witnessing a possible murder scene!” Na money the idiot dey look for for my hand!). Dem tie one big rope all over our house wen dem write this nonsense: “STAY AWAY! YOUR TAX DOLLARS AT WORK!! POSSIBLE CRIME SCENE! SUSPECT MAY BE ILLEGAL ALIEN!!” Me I nor even know say all dis penkelemesi dey shele O, I dey inside baffroom dey baff dey sing Jim Reeves like olodo wen never see hot and cold shower before!
Before you know am my iyawo and love of my life Mama_di_girl don run come meet me inside baffroom dey shout, “Ewooo! You kill person? Police dey look for you O! Abi you kill person when you dey drive and play with iyawo dem for Twitter and for Facebook? How many times I don tell you make you leave dem iyawo alone until you reach house? Agbaya! A whole old man like you! Shebi I tell you say dem take woman do you something, enh? You dis man, you nor go kill me! I hope say nor be oyinbo you kill o, otherwise na prison na im you go die put!! Olosi! If you go prison, who go take out the trash (dotty, for dose of una wen be ajepako!) If you go prison who go pay for this house? Shebi I tell you say mek you nor buy house, no, you must be like those wen better pass you! Papa_di_boy, if you die for inside prison, dem go still pay me your life insurance? Papa_di_boy!!! You nor go kill me for this America o! Why, Oh, Why did you go and kill an oyinbo person? Why are you like this?”
Na so our iyawos dey do for America o, any kpem like dis dem don throw you under molue! Before I fit say Jack Robinson, Mama_di_Girl don grab me inside baffroom, naked, “Oya go and answer your papa name for Police, olosi murderer. Goddamn sheet mora focker!” Na by luck sef na im I take grab towel take cover my blokos before my madam deliver me to police thusly: “Officers, this is the alleged murderer that you are possibly looking for. Just to be clear, he is no relative of mine, he happens to be the father of my FOUR WONDERFUL AMERICAN CHILDREN who were born here you know. Please be sure to return my towel around his waist when you are done with him, I would hate to lose it, I bought it on sale at Lord & Taylor’s, they don’t make towels like that anymore!”
As dem just dey measure my body to throw me inside their Black Maria na im I come dey shout like goat when see Christmas! “Officers! How family? Madam dem nko? They are goat bones! Goat bones! Malu! Malu! Oxtail! Oxtail!! Please don’t shoot!!!” Dem release me but them charge me for indecent exposure because the women police when come, when dem see my small chest when be like Papa Ajasco own and my small small muscle dem, and my flat yansh wen be like OBJ own, the idiots come dey laff so tay one of them come faint. Naim dem charge me for indecent exposure. Anyway dem don take the bone dem go lab for positive identification. Since dem born me, dis na di first time when I beg God make I fail exam! Come see me dey praise worship! “Spiritual powers die by fire! Die! Die! Die!” Until the result come, them say make I nor travel go anywhere. As if I wan travel before; where I dey go, who dash monkey banana, nor be money person dey take crase?
All this time when my iyawo and Police dey do me iso abi tire (“ olosi, you wan nail for inside your fat head abi you wan make we necklace you with tire wen get petrol?”) the dog dem and the deer dem when do me dis wayo just dey laff dey parambulate dey point at me dey fall dey laff dey parambulate dey point at me. Dem be witch I tell you. From now henceforth (oya laff my oyinbo now, hiss!) anytime when I eat goat meat and malu meat finish, I go grind the bone chop join, that is enh, I go hide the evidence like Baba Suwe. If I nor fit hide the evidence, I go wrap am with double Ghana Must Go bag, put am for the dustbin, then wait by the dustbin for the people wen dey carry trash to come carry am. Who wan die?